Spermogramma (Kryuger boʻyicha)

Kryuger boʻyicha spermogramma- spermatozoidlar morfologiyasini Kryuger mezonlari boʻyicha qatʼiy baholash bilan eyakulyatning kengaytirilgan tekshiruvi. Usul standart spermogrammaga qaraganda sperma sifatini batafsilroq baholaydi va erkaklar bepushtligi boʻyicha tekshiruvda qoʻllaniladi.

Eyakulyat kamida 2 va koʻpi bilan 5 sutka urugʻ chiqarishdan tiyilgandan keyin olinishi kerak. Tekshiruvdan 5 kun oldin muntazam jinsiy faollik tavsiya etiladi. Tekshiruvdan 12 soat oldin uretra va jinsiy olat sohasida har qanday tibbiy va gigiyenik vositalarni (malham, moylash vositalari, sovun, eritmalar) qoʻllashdan saqlanish lozim. Muolaja vaqtida jinsiy olat boshi sohasida har qanday malham va moylash vositalarini (lubrikantlar, kremlar, vazelin, soʻlak va b.) ishlatish qatʼiyan taqiqlanadi. Muolajadan oldin jinsiy aʼzolarni iliq suv bilan sinchiklab tozalash tavsiya etiladi. Tahlildan bir necha kun oldin stress, sovqotish va jismoniy yuklama kabi noqulay omillarni istisno qilish maqsadga muvofiq. Bir hafta davomida alkogol, shuningdek stimullovchi va psixofaol moddalarni har qanday miqdorda isteʼmol qilish tavsiya etilmaydi. Tekshiruvni siydik-tanosil tizimi va kichik chanoq aʼzolariga oʻtkazilgan tibbiy, diagnostik va fizioterapevtik muolajalardan keyin (muddat shifokor bilan kelishiladi), shuningdek urogenital yoʻlning yalligʻlanish kasalliklari va tana harorati koʻtariladigan infeksiyalarni davolagandan keyin oʻtkazmaslik lozim. 7–10 kun davomida yuqori harorat taʼsiridan (hammom, sauna, oʻrindiq isitgichi) va aviatsiya parvozlaridan imkon qadar saqlanish lozim. Dori preparatlari, kasbiy zararlar, nurlanish va boshqa salbiy omillarning taʼsir qilish imkoniyatini davolovchi shifokordan oldindan aniqlash zarur. Tahlilga yoʻllanmada klinik maʼlumotni, ayniqsa varikotsele borligini koʻrsatish lozim.